Foto: T3 Live audio- en lichttechniek Durekum

De Barghse Jonges en de Bläck Fööss hebbe zaoterdagaovond de olde grens in vuur en vlam gezet. De carnavalsbands uut Waskuupstad en Kölle zörgde same veur 'n grandioos concert ten goede van 't KWF kankerfonds en de Deutsche Krebshilfe. Aan 't einde van de aovond werd de eindprognose op 't fantastische bedrag van minimaal € 90.000,- bekend gemaak.

Aan de olde grens veur Golde Hande had zich in enkele dage tied 'n gigantisch festivalterrein uut de braakliggende grond onttrokke. 'n Groot podium, 'n eûverdekking (in geval van rège), verschillende barretjes en 'n ware VIP-tribune vormde same 't terrein veur 't benefietconcert. Dat het vol veurbereiding, moeite en tied gekos en dit alles werd meugelijk gemaak deur talloze vri-jwilligers (waoronder vol Olde Waskupen).

't Massaal toegestroomde publiek werd allereers getrakteerd op 'n stukske historie van onze Duits – Nederlandse grensstreek. De gedachte dat Duitsland en Nederland daor op de olde grens verenig zolle wodde zörgde veur 'n gevuul van 'same zun' onder de toeschouwers. Deur de grote beeldscherme aan bei-je zietkante van 't podium konde alle toeschouwers de tekste lèze. Allereers van 't jeugkoor St. Georg uut Emmerik-Hüthum, dat begeleidt werd deur de muzikante van de Bläck Fööss. Zi-j brachte nummers as ‘Het Kaklied’ en ‘Unsere Stambaum’.

Daornao was 't de beurt aan de Barghse Jonges en de Bläck Fööss. Zi-j wisselde mekaar regelmaotig af, maor zonge ook nummers same. Zoas bi-jveurbeeld ‘Wenn et leech usjing em Roxy’ ofwel in de ’s-Heerenbargse variant ‘De Familiebioscoop’. Muzikante en zangers hadde 'n wèèk eerder in Kölle al afsprake gemaak eûver de invulling van de nummers. Zo zonge bei-je bands ieder 'n couplet in hun eige taal en sloate zo 't nummer gezamenlijk af.

Ook andere klassiekers volgde, zoas ‘Bye bye my love’, ‘Du bes de stad’ en ‘Es gibt ein leben nach dem tot’, maor ook Barghse klassiekers zoas ‘Klassefoto’, ‘Wie kent ze nog’ en ‘Danse bi-j Witjes.’

't Plezier straalde d'r vanaf. Ook bi-j de professionals uut Keule. Dat blek onder andere uut de reacties op de facebookpagina van de Fööss, maor ook uut de reactie van zanger Erry Stoklosa op zien persoonlijke pagina: “Wirklich eine wahnsinns Stimmung vergleichbar mit Tanzbrunnen.”

As afsluuter spölde bei-je bands same 't nummer ‘Scholder aan Scholder’ van de Barghse Jonges. De blaadjes met Nederlandse teks ware veur de here van de Bläck Fööss nog wel efkes neudig, maor dat zörgde ook weer veur saamhorigheid. Scholder aan scholder en arm in arm. Want same staon wi-j stark. De gedachte achter dit benefietconcert kon niet beter benaodruk wodde dan met dit nummer. Same vechte tege 'n arge ziekte den helaas vol te vol aanwezig is op deze wereld. De Barghse Jonges en de Bläck Fööss hebbe d'r same met zeer vol andere vri-jwilligers veur gezörg dat wi-j misschien wel weer 'n stepke dichterbi-j de genezing van 't probleem zun.