Eind juni wier onze ni-je prins met de conclaafvergadering van de vereniging gekoaze. Wie de prins is, is onbekend, maor dat hij de kommende periode 'n drukke tied tigemoet geet steet al wel vas.
Hoe zöt den periode tot aan de novemberpronkzitting d'r uut? De PR-Commissie het old-prins Thiemo bereidt gevonde um hier 's eûver te vertelle.
Zien belèvinge ku-j in dit uutgebreide verslag lèze.
Opgave
As Vlègel geboare in Bèèk, bun ik in 1968 in ‘s-Heerenbarg komme wone. De beste beslissing den mien olders in mien lève hebbe gemaak. In mien lègere school jaore kwam ik met regelmaot bi-j de familie Hendrickse eûver de vloer. Ik kan wel stelle dat toen Gerrit I (Hendrickse) Prins van d’ Olde Waskupen wier (1975), ‘t mien het gepak. Wat was ik trots! De vader van mien vriendje is Prins!
Ik zal ook ooit prins carnaval wodde! En ‘t fees der feeste same met iedereen viere! Ik kan mien niet heuge dat ik ooit maor één carnaval in Waskuupstad heb gemis, en elk jaor weer opni-j spölde de zelfde wens weer op. Vroeger was ‘t Prins wodde niet weggelei-jd veur de ‘gewone jonge’. Maor sins ‘t gewiezigde beleid, “ook gi-j könt prins wodde” is deze ambitie alleen maor starker gewodde.
Inmiddels, alweer enkele jaore geleje zun wi-j d’r sirrieus met bezig gegaon en hebbe wi-j de neudige informatie bi-j de vereniging ingewonne. Twee dol enthousiaste adjudante gevonde die faliekant achter ‘t besluut staon; IK GAO MIEN KANDIDAAT STELLE. Echter deur ’t eûverli-je van mien bei-je schoonolders en ziektes in de directe umgèving hebbe wij ‘t ‘n paar keer uutgesteld.
Inmiddels zun wi-j (José en ik) tot de conclusie gekomme dat, naor mate de tied verstrik de kans groter is dat d’r elk jaor wel weer ‘n reje is um de kandidatuur uut te stelle, met uuteindelijk ‘t gevolg: afstel. Dus NOW ginge wi-j d’r veur! En stelde ik mien kandidaat.
Nao ‘t kandidaatstelle hebbe wi-j één en ander met ‘n old prins deurgesproake. D’r wier ons vol verteld eûver de ‘ins en outs’, de ‘do’s en dont’s’ bi-j ‘t prinseschap van d’Olde Waskupen.
Conclaaf en bekendwording
In grenscafé de Peer wier op 30 juni 2017 de conclaafvergadering geholde van d’Olde Waskupen. ‘n Spannende aovond. Belle ze wel of belle ze niet…. Um ca 22:45 uur zak bi-j mien de moed langzaam weg en gebaar ik naor José dat ik denk dat ‘t niet wat wödt. Echter um 22:55 uur geet de tillefoon, de veurzitter van d’Olde Waskupen; Eugène te Wildt vrug of José d’r ook is. Eugène vrug meerdere male of wi-j d’r klaor veur zun. José bevestig dus meerdere male met ‘Jao’. Wi-j zun ‘t gewodde!
Emiel, den ook bi-j de conclaafvergadering aanwezig is, wödt deur Sharon stiekem via de app ingelich. De kurk kan van de fles! De conclaafvergadering met stemming het zien wark gedaon en veur ons gunstig uutgepak. Ik bun de ni-je Prins 2017-2018 van Waskuupstad! Thiemo I, same met de adjudante Michel en Emiel onder ‘t motto ’Daor geet ‘t um!’ Same met José, Sharon, Tine, Michel en Emiel de eûverwinning gevierd. ‘t Wödt ‘n latertje, um 4:00 uur gaon de lempkes uut en de eugskes toe.
Samenstelle gevolg (narre en dansmarietjes)
D’r is ‘n lies met dansmarietjes den zien weerga niet kent. Maor liefs 22 meide hebbe zich opgegève as kandidaat! As eerste schifte wi-j op lèèftied. Niet te old / niet te jong. Aan ‘t end van de aovond hebbe wi-j 5 leuke meide die in onze oge zolle könne voldoen. D’r mot d’r dus nog ééntje as eventueel reserve aangeweze wodde.
Veur de functie van nar hebbe wi-j keuze uut 5 persone, waorvan wi-j wette dat d’r één koppeltje van vriende bi-j zit. Bi-j veurbaat wille wi-j graag ‘n paar ‘ferme’ knape die ‘d’r veur staon’ en bi-j veurkeur ook nog ’n ri-jbewies hebbe. Hierveur komme d’r wat ons betref 2 keerls in aanmarking. De definitieve keus van dansmarietjes wil ik graag nao ruggespraak met de vereniging definitief bepale.
Op 29 juli, nao riep beraod met contacpersoon Piet Willemse, make wi-j de lies definitief compleet. Ons gevolg zal wodde:
Dansmarietjes: Fanny Massop, Imke Vollenberg, Vere Megens en Melanie Visser.
De narre: Ferdi Berktas en Bas Moll.
Stof en pak uitzoeken, aanmeten en passen van het prinsenpak
Nao ‘n leuke eerste kennismaking op 6 juli met Annie Hendrickse en Marjolijn Nijland, make wi-j ‘n afspraak um stof uut te zuuke. Op zaoterdag 8 juli wödt de reis ingezet richting Helmond en Venray.
Mien veurstelling veur de perfecte kleur; diep donkerblauw in combinatie met witte en zilvere accente bliek toch niet de juiste keus. Rood met wit ook al niet. Tusse vol rolle stof lig één kleur den mien aandach trik. Wi-j zun ‘t nao ‘t umhange van allerlei kleure d’r eûver eens dat ‘t dit mot wodde. Ik had nooit verwach dat drie volwasse keerls zo druk konde zun met dikke velours stof, brokaat, lintjes, knope en andere aanverwante zake. Veur ‘t band (zilver) en steke vertrekke wi-j rond 12:30 uur naor Venray.
D’r motte knope, breed en smal zilverband, maor ook lint wodde uutgezoch en gekoch. Ik stao d’r versteld van eûver welke aantalle wi-j ‘t hier hebbe. 80 meter van ‘t één, 60 meter van ‘t ander, 13 meter zus en 8 meter zo! Gelukkig wette Annie en Marjolijn deur de jaore lange ervaring precies wat d’r neudig is!
Veur ‘t uutzuuke en passe van de steke motte wi-j op ‘n later moment nog ‘s terug naor Venray.
Anders dan eers gepland, besloate Annie en Marjolijn ook meteen te gaon inmète. Op 23 punte wodde mien maote opgemète, zodat de dames ‘n perfec zittend pak könne make.
Op 25 juli steet de afspraak um ‘t pak veur ‘t eers te passe. Ik bun helemaal ‘flubbergasted’ en wet effe niks te zegge. Langzaam drink ‘t tot mien deur dat dit prinsepak veur mien is. Bi-j den gedachte schiet ik toch wel ‘n klein bietje vol. Wat wödt ‘t ‘n prachtig pak. Ik stao d’r versteld van wat de dames allemaol al gedaon hebbe. Nao ‘t bewondere mag ik ‘t pak aan. Wat ‘n appat moment. Veurzichtig wod ik deur de twee dames in ‘t pak geholpe. Wie mag d’r now ‘n prinsepak aan. Ik dus! Nog nooit eerder heb ik zo’n pak aan gemage, en now zelfs MIEN PAK! ‘n geweldig gevuul! ‘t Pak besteet now nog uut drie laoge en geet uuteindelijk uut vijf laoge stof bestaon. Dus ‘t is wel ‘n warm pak. En dat mark ik meteen! Deurdat de dames had deurwarke, kan ik uuteindelijk op 12 september ‘t pak ophale. Ik mot zegge, ik bun d’r heel arg bli-j met ‘‘t vuult zo vertrouwt’. Ook ‘t pak is met één woord: geweldig gewodde. Ik kan ‘m zeker met vol trots drage.
Pak uutzuuke adjudante (en hofdames)
Al op 14 juli hebbe wi-j veur de adjudante de pakke uutgezoch. Wi-j besloate Only for Men in Doesburg te bezuuke. Onder ‘t genot van cappuccino en thee veur Tine wodde nao kleur bestudering, bi-j Michel en Emiel de maote genomme. Vervolges de pakke gepas en afgespeld zodat ze ook nog in november perfec passe.
Um de boel compleet te make zuuke wi-j ook nog naor schoe-n. Wi-j zun ’t d’r ook snel eûver eens welke schoe-n ‘t mote wodde. In eerste instantie was ‘t mien bedoeling um schoe-n te laote make bi-j Kops schoe-n in Schaijk. Handgemaak met eige ontworpe print met bi-jveurbeeld ‘t Waskupen logo. Maor, de now utgekoaze schoe-n staon te gek en wi-j bun snel eûver! De pakke wodde denzelfde wèèk versteld (op maot gemaak) en könne volgende wèek al opgehaald wodde. Res alleen de aankoop van witte blouses met blinde sluuting.
Op 24 september mochte graaf Michel en Emiel, Tine en Sharon veur ‘t eers hun capes en ‘t uuteindelijke prinsepak bewondere.
Onze vrouwe zun op de achtergrond ook al kats druk met hun kleding. Ook zi-j zulle d’r geweldig mooi uutzien met de carnaval. Ze wille hoe dan ook origineel veur de dag komme met eige jasse. D’r is daorum gekoaze um de jasse speciaal te laote make bi-j Suzan’s nèè-jatelier aan de Grintweg.
Bedenke, uuttekene en coördinere van onderscheiding en pins
De onderscheidingen wodde deur de vereniging geregeld. Echter is ‘t idee en ontwerp wel helemaol eiges bedach en het alles ‘n reje! De onderscheiding in blank ‘zilver’ met alleen de bane op de kuup in rood of blauw. De diameter van de onderscheiding zal ca 9 cm zun, waorbi-j de pote van de kuup, ‘t wapperende lint en ‘t basement veur de pin hier ‘uitstèke’. ‘t Geheel hink aan ‘n rood-wit koord. De ‘golde’ pin lig verdiep in de onderscheiding en wödt as ‘t ware gedrage deur de twee leeuwe. Nao wat aanpassinge heb ik ‘t concept digitaal gemaak en konde Erik en Maaike Menting naor de producent in Taiwan. Daoropvolgend zun d’r meerdere contac momente gewèès um foto’s en proefmodelle te beoordele. Uiteindelijk zun zowel de onderscheidinge en pins helemaol naor mien zin en klaor um in productie te wodde genomme!
't Moment suprême van de vri-jdag zelf
Eind oktober bun ik same met José naor de Gerrit Heuvelinghal gewèès um te gaon kieke hoe de prisentatie d’r ongeveer uut geet zien. Jan Stoffele, Rob Maotman en Sander Wevers hebbe ons rondgeleid en uutgeleid hoe ‘t één en ander in zien wark geet. ‘t Beloaf ‘n supergève prisentatie te wodde!
Op de donderdag veur de prisentatie heb ik same met de veurzitter en president ‘t verloop van de hele aovond nog ‘n keer deurgesproake en ware wi-j d’r klaor veur.
‘t Is gebruukelijk dat op de vri-jdag aovond pas bekend wödt wie de ni-je prins is. Eerder den aovond make de prins en adjudante ook veur ‘t eerst kennis met hun gekoaze narre en dansmarietjes. Zi-j zien den aovond pas veur ‘t eers wie de prins is. Nao ‘n kötte kennismaking van ongeveer ‘n half uurke, dient de reis te wodde ingezet naor de hal um geprisenteerd te wodde. Maor verzamele op de Hucht en ongezien blieve is vri-j lastig. In samespraak met Tom Willemse van de Technische Commissie zun enkele straotlantaarns buute gebruuk gesteld, zodat wi-j vri-j spel hebbe.
Bi-j Graaf Michel verzamele en vanuut zien achtertuin is ‘t (now in ‘t pikkedonker) ‘n kötte wandeling naor de spothal. Wi-j kleje ons bi-j Michel um en nemme allemaol nog efkes twee glèèskes voezel, um de eventuele spanninge te könne drukke. Niet vol later brink Piet Willemse de eerste lichting van ‘t gevolg. ‘t Bliek ‘n opluchting bi-j hun dat ze bi-j ‘n “jonge prins” heure, dat is al ‘n leuk compliment! Naodat de tweede lichting ook is aangekomme könne wi-j goed kennismake en prooste op ‘n geweldige tied den komme geet. Vanaf dat moment liek d’r van bei-je kante al ‘n leuke klik.
19:49 uur
Wi-j vertrekke gezamelijk lopend naor de hal. ‘t Is zo donker dat ik haos in vol ornaat in de struuk beland. Wi-j gaon via de achterkant (vluchgang) Laco binne en wodde deur Jan Stoffele naor boave gedirigeerd. Wi-j lope langs de niet geblindeerde pui, grenzend tribune en de zaal. Vervolges met de trap naor beneje. D’r wodde twee groepe gemaak 1 adjudant (Emiel), nar (Ferdi) en de dansmarietjes (Melanie en Imke) links en 1 adjudant (Michel), nar (Bas) en de dansmarietjes (Vere en Fanny) rechs. Jan Stoffele wis mien met ‘n zaklempke de weg tot achter de bühne. Daor staon Rob Maotman en Erik Schaop mien al op te wachte. Ik krieg nog snel wat instructies; “Gao daor maor staon. Mooi lache en dan pompe wi-j dat hok vol met rook. De res géét van eiges. Maor pas wel op met ’t trepke”.
Ik stao in ‘t hökske, vol met rook. ‘t Aftelle 10, 9, 8, 7, ……..3, 2,1! ‘n Torpedo schöt vervolges ‘t strandhuuske kapot. BOEM! En daor stao ik! Veur ‘n volle zaal minse. Prins Thiemo I van c.v. d’ Olde Waskupen. Wat ‘n ontlading! Carnaval kan beginne!
